[Для красивого отображения текста молитв - скачайте по этой ссылке шрифт "Academy" и установите его себе на компьютер! " Academy.ttf "]
+ + +

Молитва от слепоты.
(Пресвятой Богородице перед Ее иконой "Казанская")

О, Пресвятая Госпоже, Владычице Богородице! Со страхом, верою и любовию припадающе пред честною и чудотворную иконою Твоею, молим Тя: не отврати лица Твоего от прибегающих к Тебе, умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь же Свою святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан Помощница и Заступница: избави же и всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси, благодарне воспевающе величия и милости Твоя, являемыя над нами зде на земли сподобимся и Небесного Царствия, и тамо со всеми святыми прославим пречестное и великолепое имя Отца и Сына и Святого Духа во веки веков. Аминь.



Молитва святому Пантелеймону.
(наедине от лица болящего читаемая)

О, великий угодниче Христов, страстотерпче и врачу многомилостивый, Пантелеймоне! Умилосердися надо мною грешным рабом, услыши стенание и вопль мой, умилостиви Небесного, Верховного Врача душ и телес наших. Христа Бога нашего, да дарует ми исцеление от недуга, мя гнетущаго. Приими недостойное моление грешнейшего паче всех человек, посети мя благодатным посещением, не возгнушайся греховных язв моих, помажи тыя елеем милости твоей и исцели мя; да здрав сый душею и телом, остаток дней моих, благодатию Божиею, возмогу провести в покоянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь.



Молитва к Пресвятой Богородице.

Пресвятая Владычице моя Богородице, святыми Твоими и всесильными мольбами отжени от меня, окаянного раба Твоего, уныние, забвение, неразумие, нерадение, и все скверные, лукавые и хульные помышления, от окаянного моего сердца, от помраченного ума моего, и погаси пламень страстей моих, яко нищ и окаянен есть, и избавь меня от многих лютых воспоминаний и предприятий, и от всех действ злых освободи мя, яко благословенна еси от всех родов, и славится Пречестное имя Твое во веки. Аминь.



Молитва священномученику Киприану.

О, святой угодниче Божий, священномучениче Киприане, скорый помощниче и молитвенниче всем к тебе прибегающим. Приими от нас, недостойных, хваление наше, испроси нам у Господа Бога в немощах укрепление, в болезнях исцеление, в печалях утешение и всем вся полезная в жизни нашей. Вознеси ко Господу благомощную твою молитву, да оградит нас от падений греховных наших, да научит нас истинному покаянию, да избавит нас от пленения диавольского и всякого действия духов нечистых и избавит от обидящих нас. Буди нам крепкий облик на все враги видимые и невидимые. Во искушениях подаждь нам терпение и в час кончины нашей яви нам заступление от истязателей на воздушных мытарствах наших. Да водимые тобою достигнем горнего Иерусалима и сподобимся в Небесном Царствии со всеми святыми славить и воспевать Пресвятое имя Отца и Сына и Святого Духа во веки веков. Аминь.



Молитва детей за родителей.

Господи, Иисусе Христе, Боже наш! Ты - сирих хранитель, скорбящих прибежище и плачущих утешитель. Прибегаю к Тебе аз, сирый, стеня и плача, и молюся Тебе: услыши моление мое и не отврати лица Твоего от воздыханий сердца моего и от слез очей моих. Молюся Тебе, милосердный Господи, утоли скорбь мою о разлучении с родителем (материю) моим (ею) (имярек), душу же его (ея), яко отшедшею (ия) к Тебе с истинною верою в Тя и твердою надеждою на Твое человеколюбие и милость, приими в Царство Твое небесное. Преклоняюсь пред Твоею святою волею, еюже отъят (а) бысть у мене, и прошу Тя, не отыми точию от него (нея или них) милости и благосердия Твоего. Вем, Господи, яко Ты, Судия мира сего, грехи и нечестия отцев наказуеши в детях, внуках и правнуках даже до третьего и четвертого рода: но и милуешь отцев за молитвы и добродетели чад их, внуков и правнуков. С сокрушением и умилением сердца молю Тя, милостивый Судие, не наказуй вечным наказанием усопшего (ую) незабвенного (ую) для меня раба (у) Твоего (ю), родителя (матерь) моего (ю) (имярек), но отпусти ему (ей) все согрешения его (ее) вольные и невольные, словом и делом, ведением и неведением сотворенная им (ею) в житии его (ее) здесь на земле, и по милосердию и человеколюбию Твоему, молитв ради Пречистой Богородицы и всех святых, помилуй его (ю) и вечныя муки избави. Ты, милосердный Отче отцев и чад! Даруй мне, во все дни жизни моей, до последнего издыхания моего, не преставати памятовать о усопшем родителе (матери) моем (ей) в молитвах своих, и умолять Тя, праведнаго Судию, да вчиниши его (ю) в месте светле, в месте прохладне и в месте покойне, со всеми святыми, откуда отбежит всякая болезнь, печаль и воздыхание. Милостиве Господи! Приими днесь о рабе Твоем (Твоей) (имярек), теплую молитву мою сию и воздай ему (ей) воздаянием Твоим за труды и попечения воспитания моего в вере и христианском благочестии, яко научившему (ей) мя первее всего ведети Тя, своего Господа, в благоговении молиться Тебе, на Тебя Единого уповать в бедах, скорбях и болезнях и хранить Заповеди Твои; за благопопечение его (ея) о моем духовном преуспеянии, за теплые приносимые им (ею) о мне моления пред Тобою и за все дары, им (ею) испрошенные мне от Тебя, воздай ему (ей) Своею милостию, Своими небесными благами и радостями в вечном Царствии Твоем. Ты бо еси Бог милостей и щедрот и человеколюбия, Ты покой и радость верных рабов Твоих, и Тебе славу возсылаем со Отцом и Святым Духом, и ныне и присно и во веки веков. Аминь.



Страницы:   [1]     [2]     [3]     [4]     [5]     [6]     [7]     [9]    

Об этом сайте

Душа. Духовность. Библия. Христианство. Православие, другие конфессии. Религии мира.

Вход на сайт
Поиск